प्रेम

प्रेम

पडावे स्वत:च्याच प्रेमात
एकदा कधीतरी जीवनात
ओळखून घ्यावे स्वत:ला
आणि पुन्हा राहू नये भ्रमात

करावा स्वत:शीच संवाद
मन सारे मोकळे करून
हलके वाटेल स्वत:लाच
अश्रूही येतील मदतीला धावून

फिरावे असे एकटेच
निसर्गाच्या सानिध्यात
मोकळा श्वास घेऊन
भरून ठेवावा अंत:करणात

नटावे मुरडावे खुदकन
गालात कधीतरी हसावे
आरशा समोर उभे राहून
स्वत:चेच रूप पाहावे

मस्तपैकी हाॅटेलात जावे
मनसोक्त ताव मारावा
सिनेमा नाटकाला लावावी हजेरी
सगळा ताण विसरून जावा

कधीतरी भटकंती करावी
लुटावा आनंद प्रवासाचा
स्वत:लाच विचारावा प्रश्न
का विचार करतो कमीपणाचा

गाडी चालावी लांब प्रवासाला
छान ऐकत मधूर गाणी
धरावा  गाण्यावर ठेका
एकरूप होऊन जावे स्वत:च्या मनी

जन्माला येतो एकटा
जातांनाच जातो एकटाच
मग जीवनात एकदा तरी
जगून बघावे एकटाच

कधीतरी स्वत:लाच डोळे
पाहावे भरभरून
विचारावा प्रश्न मनाला
आहे मी खरा कोण

प्रा. दगाजी देवरे