दिसेनासै

दिसेनासे

जे दिसते ते आहे का खरं
थोड्या दिवसांनी होते सारे गायब
मग सारेच असते का खोटे
नाही पचनी पडत ही बाब

चांगली माणसे अचानक
कशी दिसेनाशी झालीत
नुसते बघत राहण्याशिवाय
नसते काही आपल्या हातात

माणूस आहे नियतीचा
हातातला खेळणा
पाहिजे तसा खेळवते
अन् बोलवण्याचा शोधते बहाणा

दिसते ते आहे अस्थिर
कशातच नाही कायमपणा
वर वर दिसते छान
पण आहे सर्व खोटेपणा

आज आहे ते उद्या नाही
कशाचाच नाही भरवसा
माणूस असतो मात्र तोर्‍यात
नाही टाकत तो वाईटचा वसा

माणूस आहे पृथ्वीवरचा पाहूणा
आला आहे काही दिवसांसाठी
कुणीच येत नाही त्याच्या बरोबर
निघतो एकटाच लांब प्रवासासाठी

कुठे गेला हे कुणालाच नसते माहीत
गेला मात्र कुणाला न सांगता
कुठे नेतो मृत्यू त्याला
हे मात्र कुणाला विचारता

काल होता तो आज नाही
भयंकर आहे हे कल्पनेपेक्षा
माणसाचा आहे नाईलाज
अपूर्ण राहते त्याची आकांक्षा

एवढा हुशार माणूस
कसा निपचित पडतो
मृत्यू आहे मोठी शक्ती
माणसाला कायमचा झोपवतो

एकटं जगायला घाबरतो माणूस
पण जाताना जातो एकटाच
घरच्यांवर कोसळते दु:खाची कुर्‍हाड
हतबल होतात मात्र घरचेच

प्रा. दगाजी देवरे